Ganwyd Dylan Thomas yn Abertawe ym 1914 a bu farw yn Efrog Newydd ym 1953. Roedd yn un o awduron mwyaf arwyddocaol yr ugeinfed ganrif, ac mae ei waith yn parhau i daro tant: mae ei edmygwyr heddiw’n cynnwys Bill Clinton, Jimmy Carter, Pierce Brosnan, Catherine Zeta Jones a Michael Douglas, a Mick Jagger, sydd â'i gwmni Jagged Films yn gweithio ar ffilm am fywyd yr awdur ar hyn o bryd. Yn fwyaf enwog am ei farddoniaeth ac am y ‘ddrama i leisiau’, Dan y Wenallt, roedd Thomas hefyd yn ysgrifennu ffuglen (yn cynnwys straeon byrion a nofelau), sgriptiau ffilm a darllediadau radio amrywiol. Ysgrifennodd hefyd doreth o lythyrau a bu’n perfformio gwaith pobl eraill.

Mae ei waith cynnar yn dangos diddordeb ym mudiadau celfyddydol arbrofol yr ugeinfed ganrif gynnar, gyda llawer o’i farddoniaeth a’i ryddiaith o’r 1930au yn cynnwys elfennau swrrealaidd a gothig. Dylanwadwyd ar gyfnod canol ei waith yn ystod y 1930au hwyr a’r 1940au cynnar gan argyfyngau’r Ail Ryfel Byd, pan fu Thomas yn gweithio i beiriant propaganda’r BBC yn Llundain. Mae ei waith hwyr yn ymdrin â gwleidyddiaeth y cyfnod ar ôl y rhyfel ac amgylchedd a daearyddiaeth Gorllewin Cymru. Mae diddordeb Thomas ym mhrosesau’r byd naturiol yn codi ei ben dro ar ôl tro yn ei holl farddoniaeth a’i ryddiaith.

Yn gyfarwydd â Gorllewin Cymru, ac mewn ffordd yn teimlo’n ‘gartrefol’ yno ers ei blentyndod cynnar (roedd teulu ei dad yn hanu o Sir Gaerfyrddin), symudodd Thomas i Dalacharn ym 1937 gyntaf, gan fyw mewn bwthyn pysgotwr cyn symud i ‘Sea View’, ac yna dychwelyd i fyw yn ‘The Boat House’ yn Nhalacharn ym 1949. Roedd yn byw yno gyda’i wraig, Caitlin, a’i blant, Colm, Aeronwy a Llewelyn tan adeg ei farwolaeth.