cartref dylan thomas


	Sir Gaerfyrddin – gardd Cymru Talacharn oedd cartref Dylan Thomas, ac mae’r ‘Boathouse’ (ble’r ysgrifennodd Under Milk Wood) bellach yn Ganolfan Treftadaeth o bwys rhyngwladol. Mae ef a’i wraig Caitlin wedi’u claddu ym mynwent y llan. Mae’r wlad o gwmpas yn brydferth dros ben, gyda’r Mynydd Du (rhan o Barc Cenedlaethol Bannau Brycheiniog) yn y dwyrain, milltiroedd o draethau euraidd, dyffrynnoedd a chymoedd hyfryd Tywi, Cothi, Teifi, Gwendraeth a Thaf, llynnoedd, bryniau a rhostir – paradwys i bawb sy’n caru byd natur ac yn hoff o wylio adar. Ac mae gweld y barcud coch yn hedfan fry dros y fro yn olygfa gyfarwydd.
	Middleton - Gardd Fotaneg Genedlaethol Cymru yw’r gyntaf i gael ei hadeiladu yn y DU ers 200 mlynedd, gyda’r Ty Gwydr Mawr yn ganolbwynt i’r cyfan ar dir Ystâd Neuadd Middleton gynt. Hwn yw’r ty gwydr siâp bwa un-darn mwyaf yn y byd ac mae llynnoedd, rhaeadrau a choetiroedd o’i amgylch. Dyma ble mae borderi blodau hiraf Prydain hefyd – atyniad heb ei ail i bob garddwr gwerth ei halen! Mae Aberglasni gerllaw - "Gardd ar goll mewn amser", sef gardd a phlasty o’r 16eg/17eg ganrif yng nghanol prydferthwch Dyffryn Tywi, gyda gardd glawstrog anghyffredin, llyn sgwâr a thwnnel ywen hynafol. Ym Mharc Arfordirol y Mileniwm, mae darn o dir diffaith 20 km ar hyd yr arfordir wedi’i drawsnewid yn llwyr, ac mae’n cynnwys cynefin gwlyptir 250 erw, cwrs golff 18-twll Jack Nicklaus (i’w agor yn 2004), a llwybr cerdded 1,000 metr ar hyd y promenâd, a llwybrau beicio (mae rhan o’r Llwybr Celtaidd yn mynd heibio’r Parc) ymhlith y gwelliannau eraill. Mae Sir Gaerfyrddin yn enwog am ei chrefftau traddodiadol: mae crochenwyr, gwehyddion, arlunwyr, gwneuthurwyr gwydr lliw a thurnwyr coed yn defnyddio eu medrau i greu anrhegion cain – neu ewch heibio i un o’r orielau celf a chrefft. I’r rheini ohonoch sy’n hoff o’ch bol, cewch flas ar amrywiaeth eang o gynhyrchion cartref o safon sydd ar werth ym marchnadoedd misol y ffermwyr yng Nghaerfyrddin a Llanelli. Byddai ymweliad â’r fferm siocled i flasu siocled cartref at ddant yr hen a’r ifanc fel ei gilydd! Ydych chi eisiau cadw’n heini? Mae cerdded a beicio yn boblogaidd iawn yma, diolch yn bennaf i amrywiaeth a phrydferthwch cefn gwlad y sir. Gyda llwybrau beicio sy’n ymestyn dros 27 milltir, maen nhw’n addas i feicwyr ifanc ac i rai sy’n hen law arni. Mae digon yma hefyd i gadw golffwyr, merlotwyr a physgotwyr yn hapus eu byd. Beth am roi cynnig ar sgïo ar lethr sych neu sledio, bowlio dan do ac yn yr awyr agored, rasio ceir bach, rasio ceir neu saethu clai laser? Mae siopau o bob math yn ein trefi sydd yr un mor amrywiol â’n cefn gwlad. Mae siopau cadwyn mawr yn nhrefi Llanelli a Chaerfyrddin yn ogystal â siopau bach a marchnadoedd dyddiol dan do. Mae’r siopau llai yn gwerthu nwyddau unigryw ac anghyffredin difyr dros ben. Oes gennych chi ddiddordeb yn nhreftadaeth y wlad? Mae olion ein hanes a’n diwylliant i’w gweld yn amlwg ar hyd a lled y fro, yn gestyll, trên stêm, amgueddfeydd di-ri ac atyniadau sydd dan ofal yr Ymddiriedolaeth Genedlaethol. Fe allwch chi hyd yn oed ymweld â mwyngloddiau aur o oes gyn-Rufeinig a mynd ar daith i grombil y ddaear neu chwilio am aur mewn padell. Os hoffech lyfryn lliw llawn, ffoniwch ein llinell ffôn 24-awr: 01558 824226 e-bost: tourism@carmarthenshire.gov.uk DOLENNI CYSWLLT i wefannau sy’n sôn am dwristiaeth a gweithgareddau yn Sir Gâr: Cymdeithas Twristiaeth Sir Gaerfyrddin Ymwelwyr â Sir Gaerfyrddin Pethau i’w gwneud yn Sir Gaerfyrddin CADW Yr Ymddiriedolaeth Genedlaethol Swyddfa Ymddiriedolaeth Genedlaethol Cymru Amgueddfa Diwydiant Gwlân Cymru Rheilffordd y Gwili Canolfan Gwlyptiroedd Cenedlaethol Merlin Bird Tours Canolfan Beicio Pedalabikeaway Clwb Golff Caerfyrddin Clwb Golff Derllys Clwb Golff Glyn Abbey Canolfan Farchogaeth Marros Farm Rheilffordd Calon Cymru Cydweli Castellnewydd Emlyn Cwm Gwendraeth Canolfan Grefftau Glyn-coch
	Yr Adran Hon: Cyflwyniad \| Hanes y Boathouse \| Dewch ar y daith rithwir \| Y Cwt Ysgrifennu \| Gwybodaeth i Dwristiaid \| Sut i gyrraedd y Boathouse Dolenni: Hafan \| Beth sy'n Newydd \| Digwyddiadau \| Dylan Thomas \| Y Boathouse \| Addysg \| Cysylltu